NUÇE EKOLOJÎ- Gundê Norçînê yê navçeya Hewagê ku li rex Çemê Firatê ye, bi germbûna hewayî re bi rengên kesk, zer û şîn xemilî.
Li gor nuçeya Ajansa Mezopotamyayê li bajarên bakurê Kurdistanê bi hatina biharê re xweza bi rengên cur bi cur dixemile. Gundê Norçînê yê navçeya Hewagê ya Rihayê ku li kêleka Çemê Firatê ye, bi çîçekên reng bi reng xemilî.
Gundê Norçînê, ji hêla malbata Taş ve hate avakirin ku di sala 1958’an de ji gundê Hojderê derketibû. Li gund 20 mal hene. Nayê zanîn ka gund navê xwe ji çi girtiye. Lê belê tê gotin ku navê xwe ji gundekî li heman herêmê di bin avê de ma ye digire. Di salên 2000’î de gelek malbat ji ber pirsgirêkên aboriyê neçar man ku koçî navenda Hewagê û Rihayê bikin. Niha li gund tenê 7 malbat dijîn.Bi hatina demsala biharê re gund bi rengên cur bi cur xemilî. Rengên kesk, bambûyên bilind û ava şîn a xweşik rê li ber dîmenên rengîn vedikin.
